Isaac Newton

Isaac Newton (Woolsthorpe, Lincolnshire; 4 de xaneiro de 1643-Kensington, Londres; 31 de marzo de 1727.) foi un físico, filósofo, teólogo, inventor, alquimista e matemático inglés, autor dosPhilosophiae naturalis principia mathematica, máis coñecidos como os Principia, onde describiu a lei da gravitación universal e estableceu as bases da mecánica clásica mediante as leis que levan o seu nome. Entre os seus outros descubrimentos científicos destacan os traballos sobre a natureza da luz e a óptica (que se presentan principalmente na súa obra Opticks) e o desenvolvemento do cálculo matemático.

Newton comparte con Gottfried Leibniz o crédito polo desenvolvemento do cálculo integral e diferencial, que utilizou para formular as súas leis da física. Tamén contribuíu noutras áreas da matemática, desenvolvendo o teorema do binomio e as fórmulas de Newton-Cotes.

Entre os seus achados científicos encóntranse o descubrimento de que o espectro de cor que se observa cando a luz branca pasa por un prisma é inherente a esa luz, en lugar de provir do prisma (como fora postulado por Roger Bacon no século XIII); a súa argumentación sobre a posibilidade de que a luz estivese composta por partículas; o seu desenvolvemento dunha lei de convección térmica, que describe a taxa de arrefriamento dos obxectos expostos ao aire; os seus estudos sobre a velocidade do son no aire; e a súa proposta dunha teoría sobre a orixe das estrelas. Foi tamén un pioneiro da mecánica de fluídos, establecendo unha lei sobre a viscosidade.

Newton foi o primeiro en demostrar que as leis naturais que gobernan o movemento na Terra e as que gobernan o movemento dos corpos celestes son as mesmas. É cualificado, a miúdo, como o científico máis grande de todos os tempos, e a súa obra como a culminación da revolución científica. O matemático e físico matemático Joseph Louis Lagrange (1736-1813), dixo que «Newton foi o máis grande xenio que existiu e tamén o máis afortunado dado que só se pode encontrar unha vez un sistema que rexa o mundo».